फलटण (प्रतिनिधी) :

फलटणच्या राजकारणात सध्या आरोप-प्रत्यारोपांच्या फैरी आणि राजकीय आव्हानांची चर्चा राज्यभर रंगली आहे. मागील काही महिन्यांपासून फलटणच्या राजकीय पटलावर आजी-माजी नेत्यांमधील संघर्ष टोकाला गेला असून, यात आता जाहीर आव्हानांची भर पडली आहे.

काही काळापूर्वी झालेल्या नगरपालिका निवडणुकांच्या पार्श्वभूमीवर, रामराजे नाईक निंबाळकर यांच्या आव्हानाला स्वीकारत माजी खासदार रणजितसिंह नाईक निंबाळकर हे गजानन चौक, फलटण येथे ओपन चर्चेसाठी हजर झाले होते; परंतु त्यावेळेस रामराजे नाईक निंबाळकर उपस्थित राहिले नव्हते.

या घटनेची पुनरावृत्ती नुकतीच १६ ऑगस्ट २०२६ रोजी पाहायला मिळाली. साखरवाडी येथील एका जाहीर कार्यक्रमादरम्यान रामराजे नाईक निंबाळकर यांनी पत्रकार परिषद घेत माढा लोकसभेचे माजी खासदार रणजितसिंह नाईक निंबाळकर यांना थेट आव्हान दिले होते की, "पोलिस बंदोबस्त व सिक्युरिटी बाजूला सारून एकटेच समोरासमोर या." यालाच रणजितसिंहांचे जोरदार प्रत्युत्तर आणि 'ते' थेट बंगला मोर्चा

रामराजेंच्या या आव्हानाला अवघ्या काही दिवसांतच जोरदार प्रत्युत्तर देत माजी खासदार रणजितसिंह नाईक निंबाळकर यांनी दिनांक १९ ऑगस्ट २०२६ रोजी सायंकाळी ८ वाजता कोणत्याही प्रकारचे शासकीय किंवा खासगी सुरक्षा कवच (संरक्षण) न घेता थेट गजानन चौक, फलटण गाठले. विशेष म्हणजे, तेथून पुढे कोणतीही सिक्युरिटी सोबत न ठेवता ते एकटेच थेट रामराजे नाईक निंबाळकर यांच्या राहत्या बंगल्यासमोर जाऊन उभा राहिले. परंतु, नेहमीप्रमाणे यावेळेसदेखील रामराजे नाईक निंबाळकर अनुपस्थित राहिल्याचे पाहायला मिळाले.