पनवेल : दहीहंडी उत्सवाच्या जल्लोषाला गालबोट लागणारी घटना पनवेल शहरातील लाईनआळी परिसरात घडली. दहीहंडी फोडण्याच्या कार्यक्रमादरम्यान ६ ते ७ जणांना अचानक विजेचा धक्का बसल्याची माहिती समोर आली आहे.
उत्सवादरम्यान मोठ्या संख्येने नागरिक उपस्थित होते. याचवेळी काही जणांना विजेचा धक्का बसल्याने परिसरात एकच गोंधळ उडाला. उपस्थित नागरिकांनी तातडीने मदत करत जखमींना उपचारासाठी रुग्णालयात हलवले.
या घटनेचा व्हिडिओ सोशल मीडियावर मोठ्या प्रमाणात व्हायरल होत आहे. विजेचा धक्का नेमका कशामुळे बसला, याबाबत अधिकृत माहिती आणि तपासानंतरच स्पष्टता येणार आहे. प्राथमिक माहितीनुसार, उत्सवादरम्यान पाण्याची फवारणी आणि विद्युत प्रवाहाच्या संपर्कामुळे ही घटना घडल्याची शक्यता व्यक्त केली जात आहे.
दहीहंडी उत्सवाच्या पार्श्वभूमीवर विद्युत सुरक्षेचे नियम आणि आवश्यक खबरदारी घेण्याचा मुद्दा या घटनेमुळे पुन्हा ऐरणीवर आला आहे.